Wanderwätter (Stahlberger)

Wanderwätter
Hüt hätter Wanderwätter
Wanderwätter
Hüt hätter Wanderwätter

Aber i wött nöd uf de Pilatus
I lauf au nöd gern graduus
Ali gönd uf de Tödi
Ali, aber nöd i
Nei, i wött nöd uf de Männliche
Und au uf susch kein ähnliche
Atzmänig gluschtet mi wenig
Pizol find i hohl
Für de hoch Ybrig hani nüt ibrig
Und au nöd für de niedrig

Aber hüt hätter
Wanderwätter
Wanderwätter
Hüt hätter Wanderwätter

Bloterepflaschter uf de Flueh
Migros Budget-Wanderschueh
I sitz dehei und tenk so no
I läb jetz scho sit 30 Johr do
I däre Stadt, sie isch nöd gross
Und trotzdem gseht me uf de Stross
Immer wieder neui Lüt
Ussert hüt
Hüt isch es heiss und d Stadt isch läär
Nur paar Tourischte wo niemer weiss wohär

Will hüt hätter
Wanderwätter
Wanderwätter
Hüt hätter Wanderwätter

Du seisch uf Flims
Isch doch nüt schlimms
Oder uf Ftan
Oder mit de Luftseilbahn
Aber en Sunntig uf em Suschte
Isch en verpfuschte
I ha kei Luscht uf Stöck und Stei
Nei nei nei, i bliib dehei
Und schwätz echli mit em Papagei
Und de Papagei seit

Wanderwätter
Er seit Wanderwätter
Wanderwätter
Hüt hätter Wanderwätter